Æskan
Ég er fæddur og uppalinn til 16 ára aldurs í Reykjadal í Suður-þingeyjarsýslu.

Ég er frá sveitabæ sem er fremst í Reykjadal upp á fallegri heiði. Þar liggja 5 býli all þétt. Stafn, Vellir, Vallholt, Fellshlíð og Fellshlíð 2. Ég bjó í Fellshlíð, þar býr Hermann bróðir minn ásamt konu sinni Önnu Geirlaugu. Aðalsteinn bróðir minn býr í Fellshlíð 2 ásamt konu sinni Guðlaugu og börnum þeirra. Alls erum við 5 bræðurnir, Unnsteinn elstur, svo Aðalsteinn, Ingóflur, Hermann og loks örverpið ég. Ég og Unnsteinn erum búsettir á Akureyri en hinir í Reykjadal, Unnsteinn dvelur mikið á Laugum (í Reykjadal).

Ein af fyrstu mínum minningum er þegar Hermann var að draga mig á snjóþotu, það hefur greinilega verið afar spennandi fyrst ég man það þó ég hafi ekki verið líklega eldri en 3 ára. Jú svo man ég eftir því þegar Hermann reyndi að drekkja mér í andapollinum, við vorum saman á fleka sem var búinn til úr dráttavélardekkslöngu og krossviðarplötu ofaná, svo var kústskaft notað til að ýta sé áfram. Ég datt af og var á bólakafi og Hermann náði andlitinu uppúr með því að krækja kústskaftinu í úlpuhettuna og lyfta mér upp úr.

Ég lék mér mikið einn, átti enga jafnaldra í Stafnshverfi, Geiri (Hólmgeir S.) á Völlum er 5 árum eldri en við lékum okkur annað slagið saman. Þórey dóttir Aðalsteins bróður er þremur árum yngri en ég en við náðum aldrei að verða leikfélagar, skrítið en satt, en í staðinn notuðum við hvert tækifæri til að rífast eins og hundur og köttur.

Unglingsárin

Sumarið eftir fermingu keypti ég mér skellinöðru og notaði hana grimmt til að komast "út í dal" og hitta vinina. Það var körfuboltamenning í gangi þá og fóru flest sumarkvöld í það að spila einhversstaðar körfu. Það kom fyrir að það var farið í heiðarferðir og voru það jafnan mikil ævintýri. Ég hlýt að hafa góðan verndarengil vegna þess að ég ætti að vera löngu dauður eftir að hafa átt þessa skellinöðru.

Sumarið þegar ég var 16 (1995) þá fluttum við til Akureyrar og ég fór í VMA. Ekki nennti ég að læra mjög mikið en gekk ágætlega samt. Þennan vetur fékk ég bílpróf og viku seinna var haldið ásamt félögum á Prodigy tónleika í Laugardagshöll, það var ævintýraferð sem gekk vel, fórum á ónýtri Skóda bifreið sem stóð sig ágætlega samt. Það hvellsprakk á ljósum í Rvík og fleira sniðugt en það var bara til að krydda tilveruna. Sumarið eftir vann ég í sundlauginni í Mývatnssveit, nánar tiltekið í þorpinu. Það var minnisstætt sumar. Ég bjó í kennslustofu á 2. hæð í skólanum þar, sem er við hliðina á sundlauginni og svona 100 metra frá þorpinu sjálfu. Ég spilaði stundum á barnum á kvöldin og tók borgunina útí öli. Þetta er ekki til að státa sig af. Ég skil ekki enn hvernig mér tókst að eyða sumarkaupinu jafnóðum, því ég þurfti ekki að borga fyrir húsnæði eða af bíl.

Þetta sumar yfirgaf Nikulás Halldórsson okkuri. Blessuð sé minning hans.

Veturinn eftir var ég að vinna á kvöldvöktum á Skinnaiðnaðinum. Þá kynntist ég barnsmóður minni. Hér læt ég lokið kaflanum um unglingsárin og held áfram í kaflanum fullorðinsárin.

Fullorðinn

Eftir 6 mánuði í Skinnaiðnaðinum hætti ég þar, og farinn að búa. Um sumarið vann ég í Krossanesi og fram á haust. Þá flutti ég í Lauga og vann í Laugafiski fram á vor. Þá fór ég aftur til Akureyrar og fékk vinnu það sumar í Kristjánsbakarí, það var frábært, þarna var ég 18 ára. Um haustið tók ég eina önn á Félagsfræðibraut í VMA. Rétt fyrir jól fékk ég vinnu í Ásprent/pob við skönnun, litgreiningu og hönnun, þá byrjaði nýtt tímabil í lífi mínu. Í febrúar 1999 fæddist Pétur Ívar. Pétur í höfuðið á föður mínum og Ívar í höfuð á 2 frændum Ástu, Ívari frá Skógarseli og Ívari Björnssyni. Ég keypti íbúð 1999 og seldi hana í febrúar 2003. Ég vann mikla yfirvinnu og var þá kominn með mikla tölvudellu. Þegar ég kom heim eftir vinnu fór ég jafnan í tölvuna og var þá í tölvu þegar augun voru opin. Við Ásta slitum samvistum febrúar 2002. Í ágúst 2002 breytti ég til og hóf störf hjá góðu netfyrirtæki sem hét Skrín sem var svo seinna keypt af Skýrr og nú EJS á Akureyri þar sem ég starfa í dag sem sérfræðingur. 1. júní 2003 flutti Guðfinna mín til mín þar sem ég leigði í Holtagötunni og haustið sama árfluttum við í Örk Eyjafjarðarsveit. Vorið 2004 fluttum við í Eyrarlandsveg 12 þar sem við bjuggum ásamt kettinum Skotta þar til 1. júlí 2007 en þá keyptum við efri hæðina í Bjarmastíg 3. Pétur Ívar er hjá okkur reglulega og stundar nám við Stórutjarnaskóla. Guðfinna nemur við Myndlistarskólann á Akureyri. Lítið á heimasíðuna hennar Guðfinnu á www.gudfinna.net

Síðast breytt 1. apríl 2009

Hér eru nokkrar myndir þar sem egóisminn og hégóminn nýtur sín...